දැනට රජයේ ලොකුම ටෙන්ඩරය - ගල් අඟුරු නැව් 5ම බාලයි

ක්‍රමයේ වෙනසක් ඇති කරනවා කියූ මේ රජය ගෙනාපු ගල් අගුරු නැව් 5ක්ම බාලයි - විපක්ෂ නායක

මේ වන විට ගල් අගුරු නැව් 5ක් පමණ ගොඩබා ඇති බවත් මේ සියල්ල බාල ගල් අගුරු බවත් නොරොච්චෝලේ බලා ගාරයෙන් මෙගාවොට් 300 බැගින් 3ක් එනම් මෙගාවොට් 900ක් නිපදවුවත් මේ බාල ගල් අගුරු නිසා උපරිම ධාරිතාවට යාමට නොහැකි වී ඇති බවත් මේ සම්බන්ධයෙන් වන සජිවී දත්ත පවා ඇති නිසා මේ ගැන තමා ආංශික අධීක්ෂණ කාරක සභාවේදී ප්‍රශ්න කරන විට ඒවාට උත්තර දීමට නොහැකි වු බවත් රටට ශක්තිය දෙනවා කියූ ක්‍රමයේ වෙනසක් ඇති කරනවා කියු රජය කටයුතු කර ඇත්තේ මේ ආකාරයෙන් බවත් විපක්ෂ නායක සජිත් ප්‍රේමදාස මහතා පැවසීය.

විපක්ෂ නායක සජිත් ප්‍රේමදාස මහතා මේ බව කියා සිටියේ අද හම්බන්තොට දිස්ත්‍රික්කයේ බෙරලිහෙල ග්‍රමයෙ ගෙවි ගැටලු සාකච්ඡාව හා එක්වෙමිනි.

සමගි ජන බලවේගය බොරුව අසත්‍ය මූලික කර ගෙන දේශපාලනය සහ සංවර්ධනය සිදු නොකරන බවත් සමගි ජන බලවේගයේ එකම අරමුණ වන්නේ ජනතාවට හොද ජන ජීවිතයක් උදා කරවීම බවත් අද ජනතාව ලබන ආදායමෙන් හොද ජීවිතයක් ගත කළ නොහැකි බවත් බඩු මිල වැඩි වී අහස උසට නැගී මාසික ආදායම් අඩු වී ජීවත් වීමට පවා නොහැකි වී ඇති බවත් මේ යන විදිහට ගියොත් ජනතාවවත් රටවත් ඉතුරු නොවන බවත් බොරුවෙන් මුසාවෙන් රැවටිල්ලෙන් නම් රාජ්‍ය පාලනයක් ගෙන යා නොහැකි බවත් විපක්ෂ නායකවරයා පැවසීය.

අද ගොවියාට ස්ථාවර මිලක් ලැබෙන්නේ නෑ

ගොයම් කැපෙන කාලය ළං වන විට ගොවියාගේ අපේක්ෂාව වන්නේ වී කිලෝවට පොරොන්දු වූ මිල ලැබෙනු ඇතැයි වුවත් අද පෙනෙන්නට ඇත්තේ වී කිලෝවට රු. 120ක් ලැබෙයි ද කියා විශාල බියක් ගොවියාට ඇති බවත් මේ රජයට වි මිල දි ගැනීමේ සූදානමක් නොමැති බවත් වී මිලදී ගන්න අවශ්‍ය ගබඩා ටිකවත් මේ රජය සූදානම් කර නොමැති බවත් මේ තත්ත්වය තුළ නිෂ්පාදන පිරිවැයවත් ආවරණය කළ හැකි දෝ කිය බිය ගොවියා තුළ පැන නැගී ඇති බවත් විපක්ෂ නායකවරයා පැවසීය.

දැන් ගොවියා අතුරු කන්න පවා අතහැරලා

වත්මන් රජයේ මැති ඇමතිවරු මැතිවරණ සමයේ ගොයම් කමින් වීවලට සහතික මිල ලබා දෙන බව පැවසූ තවත් තවත් අවස්ථාවක අනෙකුත් සියලුම භෝගවලට ස්ථාවර ස්ථිර සහතික මිලක් ලබා දෙන බව පැවසුවත් ඒවා කිසිවක් නොවු බවත් අතුරු කන්නවල මුං ආදිය වගා කළත් ස්ථිවර මිලක් නොලැබුණු නිසා ගොවියා දැන් අතුරු කන්න පවා අතහැර ඇති බවත් විපක්ෂ නායකවරයා පැවසීය.

ස්ථාවර මිල දෙනවා කියූ අය අද රජපුටුවල

එදා වීවලට සහතික මිල දෙනවා කියූ අස්වැන්නට ස්ථාවර මිලක් දෙනවා කියූ වත්මන් රජයේ පුද්ගලයන් අද පාර්ලිමේන්තුවේ සැප පුටුවලට වී ගොවියා අමතර කර ඇති බවත් අලි මිනිස් ගැටුම නැති කරන්න හම්බන්තොටට විතර රු. මි. 500ක් වෙන් කළත් අදටත් එයට ස්ථිර විසඳුමක් නොමැති බවත් විපක්ෂ නායක සජිත් ප්‍රේමදාස මහතා පැවසීය.

මේ අවස්ථාවේ සිදුවිය යුත්තේ මිනිස් සම්පතත් වගාවත් වන සම්පතත් රැක ගෙන ගොවිතැන තිරසර කර ගොවිතැන දියුණු කර තිරසර සංචාරක කර්මාන්තයත් ශක්තිමත් කර මිනිසා මෙන්ම වන සතුන්ගේ ද ජීවිත රැකෙන වැඩපිළිවෙළක් කරා යා යුතු බවත් නමට විතරක් රු. මි. 500ක් වෙන් කරා කියා ගොවි ජනතාව රවටා ඇති බවත් විපක්ෂ නායකවරයා පැවසීය.

අපේ රටට අවශ්‍ය වන්නේ සුහුරු ගොවි සංකල්ප

ගොවියා අපේක්ෂා කළ ආකාරයේ අස්වැන්නක් නොලැබීමට හේතුව රටට ගෙන්වන්නේ බාල පොහොර නිසා බවත් මේ සම්බන්ධයෙන් කිසිදු නියාමනයක් නොමැති බවත් බීජවල ගුණාත්මකභාවය, මිල, යෙදවුම් මිල, නිෂ්පාදන මිල ආදී සෑම තැනකදීම ගොවියාට කුඩම්මාගේ සැලකිල්ල ලැබෙන බවත් බාල භාණ්ඩ ගොවියාට ලැබෙන බවත් මේ බාල යෙදවුම් නිසා ගොවියාගේ අස්වැන්න පවා අඩුවන නිසා මේ අවස්ථාවේ අප රටට අවශ්‍ය වන්නේ සුහුරු ගොවි සංකල්ප බවත් විපක්ෂ නායක සජිත් ප්‍රේමදාස මහතා පැවසීය.
තමා සිංගප්පූරුවේ සිදු කළ සංචාරය අතරතුර වාහන නිෂ්පාදන ආයතනයක් නිරීක්ෂණයට ගිය පසු එහි වැඩි ප්‍රමාණයක් සිදු වන්නේ රොබෝ තාක්ෂණය මත බවට දැන ගැනීමට හැකි වූ බවත් මේ කර්මාන්තශාලාව ඇතුළත සුහුරු ගොවිතැන් පවා සිදුවන බවත් මේ සියලු වගා කටයුතු කරන්නේ රොබෝ තාක්ණයෙන් බවත් ඒ ආකාරයෙන් නිපදවන එළවළු සේවකයන්ගේ ආහාර පිණිස යොදා ගන්නා බවත් විපක්ෂ නායකවරයා පෙන්වා දුන්නේය.

මේවා කියද්දි ආණ්ඩුව දන්නේ සමාජ මාධ්‍ය හරහා මඩ ගහන්න විතරයි

අප රටටත් සුහුරු කෘෂිකර්මය සිදු කළ හැකි වුවත් රජය ඊට අවශ්‍ය සහයෝගය නොදෙන බවත් නුදුරේදීම බිහිවන සමගි ජන බලවේග රජය තුළ සුහුරු කෘෂිකර්මාන්තයට අවශ්‍ය සහයෝගය ගොවියාට ලබා දි ගොවියාගේ නිෂ්පාදන ධාරිතාව වැඩි කර ගැනීමට අවශ්‍ය සුහුරු තාක්ෂණය උපකරණ හා දැනුම ලබා දෙන බවත් කෘෂි නිෂ්පාදන අපනයනය කරන තැනට අප රට ගෙන එන බවත් නෙදර්ලන්තය මෙන් කෘෂි අපනයන සිදු කරන තැනට අප රට ගෙන ආ යුතු බවත් මේවා විහිලු කතා නොව ලෝකයේ දැනටමත් ප්‍රායෝගිකව ක්‍රියාත්මක වන සංකල්ප බවත් විපක්ෂ නායකවරයා පැවසීය.

ආණ්ඩුවේ ඇත්තේ බොරුවයි රැවටිල්ලයි විතරයි

අපේ රටේ පාලකයන්ට අවශ්‍ය රට පරණ තත්ත්වයේම තියා ගැනීම බවත් වත්මන් රජය විපක්ෂයේ සිටින විට උද්ඝෝෂණ කර වාරි පද්ධති පුනරුත්ථාපනය කළ යුතු බවට පැවසුවත් දැන් ඒ කිසිවක් සිදු නොවන බවත් දැන්වත් විධිමත් වාරි ප්‍රතිසංස්කරණයක් සිදු විය යුතු බවත් මේ රජය විපක්ෂයේ සිටින විට බොරු කියා බලය ගෙන දැන් රැවටිල්ල ක්‍රියාත්මක කරන බවත් විපක්ෂ නායකවරයා පැවසීය.

අද වන විට ජාතික ආරක්ෂාව ගැන ටියුෂනුත් නෑ

ජාතික ආරක්ෂක ප්‍රශ්න සති කිහිපයකින් විසදා ජාතික ආරක්ෂාව ගැන ටියුෂන් දෙන්නම් කියූ වත්මන් රජයේ මැති ඇමතිවරු සිටියත් ඊයේ මහ පාරේ නීතිඥවරයකු සහ ඔහුගේ බිරිද අමු අමුවේ ඝාතනය කරන තැනට රට පත්ව ඇති බවත් අද වන විට පාතාල කල්ලි අතර මිනිමරු යුද්ධයක් ක්‍රියාත්මක වන බවත් මේ කෘර කුරිරු ඝාතන සංස්කෘතියක් අප සමාජය වෙලාගෙන ඇති බවත් විපක්ෂ නායකවරයා පැවසීය.

අද රටේ නිදහස් ඇත්තේ ආණ්ඩුවට බොරු කීමට පමණයි

අද වන විට පාතාල කල්ලි බියක් සැකයක් නැතිව මහ පාරේ ඝාතන කරන විට ජීවත් වීමේ නිදහස පවා අහිමි වි ඇති බවත් අද රටේ ඇත්තේ ආණ්ඩුවේ මැති ඇමතිවරුන්ට බොරු කීමේ නිදහස බවත් බොරුවයි ඇන්දවිල්ලයි විතරක් මේ රජය සිදු කරන බවත් විපක්ෂ නායකවරයා පෙන්වා දුන්නේය.